സാളഗ്രാമങ്ങളുടെ പേരുകളും അവയുടെ ലക്ഷണങ്ങളും

സാളഗ്രാമങ്ങൾ പത്തൊൻപത് തരത്തിൽ ഉണ്ടെന്ന് പുരാണം പറയുന്നു. 

1.ലക്ഷ്മീനാരായണ

*******************

ഒരു ദ്വാരവും നാല് ചക്രങ്ങളും വനമാലയും(വനമാല പോലെ ഒരു രേഖ)കാർമേഘംപോലെ നിറത്തോടും കൂടിയത്. 

2.ലക്ഷ്മീജനാർദ്ദനം

*********************

ഇത് ലക്ഷ്മീനാരായണം പോലെ തന്നെ.എന്നാൽ വനമാല ഉണ്ടായിരിക്കയില്ല. 

3.രഘുനാഥം  

**************

രണ്ടു ദ്വാരവും നാല് ചക്രങ്ങളും പശുക്കിടാവിന്റെ കുളമ്പടി പോലെയുള്ള അടയാളവും ഉള്ളത് ; ഇതിനും വനമാല ഉണ്ടായിരിക്കയില്ല. 

4.വാമനം 

**********

വളരെ ചെറുതായി രണ്ട് ചക്രങ്ങളോടും കാർമേഘനിറത്തോടും കൂടിയിരിക്കുന്നത്. ഇതിനും വനമാല ഉണ്ടായിരിക്കില്ല. 

5.ശ്രീധരം 

**********

വാമനത്തെപ്പോലെയിരിക്കുന്നതും എന്നാൽ വനമാലയോടുകൂടിയതുമായ ലിംഗം. ഇതിരിക്കുന്ന ഗൃഹത്തിൽ സദാ ശ്രീ ഉണ്ടായിരിക്കുന്നതാണ്. 

6.ദാമോദരം

*************

വലുതായും ഉരുണ്ടും വനമാല ഇല്ലാതെയും രണ്ട് ചക്രത്തോടുകൂടിയും ഇരിക്കുന്നത്. 

7.രണരാമം 

************

അധികം വലുതാകാതെയും നന്നേ ചെറുതാകാതെയും മധ്യമവലുപ്പത്തിൽ ഉരുണ്ട് രണ്ട് ചക്രങ്ങളോടും, ബാണപ്രഹാരചിഹ്നത്തോടും അമ്പ്, ആവനാഴി ഇവയുടെ ചിഹ്നത്തോടുകൂടിയും ഇരിക്കുന്നത്. 

8.രാജരാജേശ്വരം 

******************

രണരാമവലുപ്പത്തിൽ ഏഴ് ചക്രങ്ങളോട് കൂടിയും ഛത്രഭൂഷണഭൂഷിതമായും ഇരിക്കുന്നത്. ഇത് മനുഷ്യർക്ക് രാജസമ്പൽപ്രദമാകുന്നു. 

9.അനന്തം

************

 സാമാന്യം സ്ഥൂലിച്ച് പതിനാല് ചക്രങ്ങളോടുകൂടി കാർമേഘത്തെപ്പോലെ കറുത്തിരിക്കുന്നത്; ഈ സാളഗ്രാമം മനുഷ്യർക്ക് ധർമ്മാർത്ഥകാമമോക്ഷങ്ങളാകുന്ന നാല് പുരുഷാർത്ഥങ്ങളെയും കൊടുക്കുന്നതാണ്. 

10.മധുസൂദനം

*****************

 ചക്രാകാരമായും രണ്ട് ചക്രങ്ങളോടുകൂടിയും  ഗോഷ്‌പദചിഹ്നത്തോടുചേർന്നും കാർമേഘനിറം കലർന്നും സാമാന്യം വലുപ്പത്തോടുകൂടിയും ഇരിക്കുന്ന സാളഗ്രാമം. ഇത് നല്ലശോഭയുള്ളതായിരിക്കും. 

11.സുദർശനം 

****************

സുദർശനത്തിന് ഒറ്റ ചക്രം മാത്രമേ ഉണ്ടായിരിക്കുകയുള്ളൂ. 

12.ഗദാധരം

*************

ഇതിനും ഒരു ചക്രമേ ഉടായിരിക്കയുള്ളൂ. അതുതന്നെ നല്ലപോലെ പ്രകാശിക്കാത്തതുമായിരിക്കും. 

13.ഹയഗ്രീവം 

***************

ഇതിന് രണ്ട് ചക്രങ്ങളും അശ്വമുഖാകൃതിയും ഉണ്ടായിരിക്കുന്നതാണ്. 

14.നരസിംഹം 

****************

വളരെ വിസ്താരമായ വായും രണ്ട് ചക്രങ്ങളും ഭയങ്കരമായ ആകൃതിയും ഉള്ള നരസിംഹസാളഗ്രാമം ഉടനടിയായിത്തന്നെ വൈരാഗ്യത്തെ കൊടുക്കുന്നതാകുന്നു. 

15.ലക്ഷ്മീനരസിംഹം 

***********************

ഇതിനും വിസ്താരമായ വായും രണ്ട് ചക്രങ്ങളും ഉണ്ടായിരിക്കും. അവയ്ക്കുപുറമെ വനമാലയും കൂടെ കാണാം. ഈ സാളഗ്രാമം ഗൃഹസ്ഥന്മാർക്ക് സുഖത്തെ പ്രദാനം ചെയ്യുന്നു. 

16.വാസുദേവം 

****************

ദ്വാരദേശത്തിങ്കൽ രണ്ട് ചക്രങ്ങളും ഉരുണ്ട ആകൃതിയും സ്ഫുടതയും പ്രകാശവുമുള്ള സാളഗ്രാമത്തിനു പേര് വാസുദേവം. ഇത് സർവ്വാഭിഷ്ടങ്ങളും പ്രദാനം ചെയ്യുന്നു. 

17.പ്രദ്യുമ്നം 

**************

ഇതിന് സൂഷ്മമായ ഒരു ചക്രം മാത്രമേ ഉണ്ടായിരിക്കുകയുള്ളൂ. നിറം കാർമേഘംപോലെയും ആണ്. എന്നാൽ പുറമേകാണപ്പെടുന്ന ഒരു സുഷിരത്തിനകത്ത് അനേകച്ഛിദ്രങ്ങൾ ഉണ്ടായിരിക്കുന്നതാണ്. ഇത് ഗൃഹസ്ഥന്മാർക്ക് സദാ സുഖം പ്രദാനം ചെയ്യുന്നു. 

18.സങ്കർഷണം 

*****************

സങ്കർഷണലിംഗത്തിന് രണ്ട് ചക്രങ്ങളുടെ മുഖങ്ങൾ പരസ്പരം ചേർന്നിരിക്കുന്നത് കാണാം. പിൻഭാഗം മുൻഭാഗത്തേക്കാൾ കനമുള്ളതായിരിക്കുകയും ചെയ്യും. ഇതും ഗൃഹസ്ഥന്മാർക്ക് സദാ സുഖം പ്രദാനം ചെയ്യുന്നു. 

19.അനിരുദ്ധം 

****************

ഇതിന്റെ വർണ്ണം പീതമാണ്. നല്ലപോലെ ഉരുണ്ടും അതിയായ ശോഭയോടുകൂടിയും ഇരിക്കുന്നതാണ്. ഇതും ഗൃഹസ്ഥന്മാർക്ക് സദാ സുഖം പ്രദാനം ചെയ്യുന്നു.